الحلقة الخامسة من المسلسل(عجبني فيكي لون عينيكي)

مرحباً بكم من جديد مع الحلقة الخامسة من :



عجبني فيكي لون عينييكي



ومع اختكم
ايمان

آآآآآآآآآآه منك يا ايمان

يا تري ياايمان عاملة ايه ؟
حالتك النفسية اخبارها ايه دلوقت بعد فضيحتك في الجامعة ؟
هل راضية عن نفسك ؟
بم تُحدثك نفسُكِ يا ايمان ؟

****
تصحي ايمان من النوم وتكلم نفسها
يارب اشمعنا انا اللي حصلي كدة ؟
ما البنات كلها زيي ويمكن اكتر كمان مني ؟
بس انا ربنا بعتلي رسايل كتير
وانا اللي كنت بضعف قدام الولد دا
خلاااااااص اتفضحت بعد اما ربنا سترها عليا كتييييييييير
يااااااااااااارب
منه لله الولد دا , ازاي يعمل كدة ؟
يبقي هو كان فاكرني بنت مش كويسة وكان بيعلب بيا كل دا ؟؟
ازاااااااي ؟ بعد الحب دا ؟ والمشاعر دي ؟ والأحلام دي ؟
انا مش مصدقة نفسي ,
بس برده انا السبب عشان روحت معاه المكان دا وطبعا كان ثالثنا الشيطان

ربنا يستر ومحدش يعرف من البيت عندي باللي حصل ؟ بس اكيد هم مش هيعرفوا اصل هيعرفوا منين ؟
وانا كمان مش هروح الكلية تاني بحجة اني عايزة اقعد اذاكر بقي قبل الامتحانات ,
اه صح الامتحانات وانا مذاكرتش حاجة خالص وباقي خلاص 3 اسابيع عليها يا نهار ابيض
اممممممممممممممممم
تسمع صوت رسالة واردة من ....

الولد إياه


(( ايمان انا اسف , مكنش قصدي عشان خاطري سامحيني يا ايمان, لو مسامحتنيش هنتحر لو مبعتليش رسالة وقولتيلي انك مسامحاني انا بجد هنتحر ومش بهزر ))

ايمان بتقري الرسالة ومحتارة والشيطان جمبها طبعا ويقولها حرام عليكي الواد هينتحر بسببك , يرضيكي يدخل النار بسببك ؟ مقالك خلاص انه مكنش يقصد , وقالك اسف عايزة ايه تاني ؟ وبعدين ما انتي السبب برده يا ايمان روحتي معاه وهيئتيله الجو , يلا بقي ابعدي الشيطان عنك _ اللي هو انا _ و ابعتيله رسالة السماح ومتبقيش قاسية وقلبك جامد أمال بتحبيه إزاي بقي ؟

طبعا الوسوسة شغالة
ونفسها الأمارة بالسوء شغالة برده
وقلبها اللي اتعلق به جامد برده مظبط الدنيا
هيودوكي علي فين تاني يا ايمان ؟
اصلي اتعلقت به اوي
مش هقدر ابعد عنه
انا مقدرش تعدي عليا لحظة إلا ولازم افكر فيه
مش عارفة افكر
اعمل ايه ؟
تصلح من وضعها الغلط دا وتقطع علاقتنا بالشاب دا خالص وتفوق لنفسها في كل حاجة ؟! ولا قلبها اللي اتعلق بالشاب جدااا واللي ناوي ينتحر لو مكلمتوش !!!
يارب اعمل ايه ؟؟؟؟؟؟؟؟؟

بتسألي ربنا يا ايمان !!!!!!
ربنا اللي خلتيه أهون الناظرين إليكي !!
ربنا اللي رسايله ليكي بتبقي أقل اهتمام منك ولا تُلقي لها بالاً !!
ياااااااااااااا يا ايمان
كل دا ومش عايزة تفوقي ؟
كل دا مصممة علي المعصية ؟
كل دا مش عايزة تختاري ربنا ؟

يااااااااااااااااااااه ياايمان



وفي وسط الحيرة اللي هي فيها دي تقلب في الموبايل تلاقي نمرة الاخت المنتقبة اللي كلمتها قبل كدة
فتفتكر طريقة كلامها المُريحة وتفتكر ان ملهاش صحاب خالص وانها دفنت نفسها مع الشاب دا وبعدت عن كل فرصة صداقة فتتردد تكلمها ولا لأ ..
فقالت اما اكلمها لعلي الاقي الحل عندها .
تتصل بيها والاخت ترد :



الاخت : السلام عليكم
ايمان : وعليكم السلام ازيك يا اختي
الاخت : اهلا مين حضرتك ؟
ايمان : انا اللي انتي نصحتيني قبل كدة ف الكلية وادتيني تليفونك .
الاخت : اه اهلا وسهلا بيكي اختي الحبيبة والله انا سعيدة جدااااا بيكي انك كلمتيني وافتكرتيني ممكن تعرفيني باسمك ؟
ايمان : الله يسعدك انا اسمي ايمان
الاخت : ما شاء الله ايمان ربنا يجعلنا واياكِ مع أهل الجنة .
ايمان : اللهم امين , كنت عايزاكي يا اختي اتكلم معاكي في حاجة ضروري جدااا .
الاخت : انا تحت امرك يا حبيبيتي تحبي امتي وفين ؟
ايمان : بلاش الجامعة, اختاري اي مكان غير الجامعة
الاخت : ليه يا حبيبتي دا الجامعة هي ءأمن مكان نتقابل فيه
ايمان في سرها ءأمن مكان !! دا دا مكان فضيحتي : لا يا اختي مش عايزة الجامعة .
الاخت : طيب يا حبيبتي ممكن تقوليلي نبذة عن الموضوع لحد ما نتفق ع مكان نتقابل فيه .
ايمان : حاضر الموضوع هو اني ........ وحكيتلها موجز بسيط كدة لحد الرسالة الاخيرة بتاعة الانتحار .
الاخت : لا حول ولا قوة إلا بالله .. طيب يا اختي اول حاجة تعمليها تقومي حالا تصلي ركعتين توبة لله وتبدئي صفحة جديدة مع ربنا .
وثاني حاجة لازم تغيري رقم موبايلك ومترديش ع الشاب دا نهاااااااااائي لحد منتقابل إن شاء الله .
ايمان : بس انا متعلقة به بصراحة يا اختي اوي ومقدرش ابعد عنه ابدا .
الاخت : طيب يا ايمان لحد ما منتقابل بس
ممكن ؟
ايمان: إن شاء الله هحاول
طيب هنتقابل امتي وفين ؟
الاخت : طيب ايه رايك في المسجد اللي جمب الكلية ؟
ايمان : جمب الكلية طيب اهو اهون شوية من الكلية نفسها طيب امتي ؟
الاخت : بكرة علطول انا هفضيلك نفسي بإذن الله
ايمان : خلاص تمام ومع بعض بالتليفون بقي , وشكرا جداا اختي .
الاخت : ربنا ييسر حبيبيتي وانا تحت امرك دايما .




طيب اما اقوم انا اصلي الصلوات اللي عليا وربنا يهديني
واشوف حال البيت دا ايه ..
تخرج من اوضتها تدور ع اي حد في البيت مفيش حد
ايه دا امال راحوا فين ؟؟؟؟


تتصل بماما ع الموبايل مش بترد
طيب بابا برده مش بيرد
ايه دا هو في ايه ؟
هم راحوا فين ؟ وانا مش داريانة باي حاجة كدة
ربنا يستر هروح اصلي يكونوا جم إن شاء الله
راحت تصلي والحمد لله ربنا يهديكي يا ايمان
وقاعدة منتظرة بتفكر في الف حاجة
بس الاساسي عندها دلوقت :
1- معاد بكرة مع الأخت .
2- اهلي راحوا فين ؟ .
من كتر الانتظار دخلت نامت عشان معاد بكرة
وظبطت المنبه ع المعاد مش معاد صلاة الفجر ربنا يهديكي يا ايمان ويفتح ع الاخت المنتقبة وتكون سبب في هدايتك _آمين _ .


وتصحي تدور عليهم الحمد لله لقتهم نايمين
كتبتلهم ورقة
انا راحة اقابل صاحبتي وجاية علطول
بنتكوا ايمان....... ..

قابلت الاخت ودار الحوار الآتي :
الاخت : اهلين ايمان حبيبيتي اخبارك ايه ؟
ايمان : الحمد لله يا اختي ادعيلي انا حالتي النفسية زي الزفت .
الاخت : لا خير يا حبيبيتي إن شاء الله , انا ملاحظة انك مطوّلة الطرحة شوية عما شوفتك اول مرة صح ؟
ايمان : دانا زمان كنت كدة واكتر كمان .
الاخت : إن شاء الله تبقي احسن واحسن , يلا يا قمر ندخل ف موضوعنا ها قفلتي الموبايل ؟
ايمان : اه قفلته طول الوقت , بس انا يا اختي مش هقدر ابعد عنه انا اتعلقت به جامد وهو كمان بيحبني .
الاخت :طيب مسألتيش نفسك دا لو بيحبك بجد كان عمل فيكي كدة ؟
كان لعب بيكي كدة ؟
وسمح لنفسه ان يسوّء سُمعتك في الكلية كدة ؟
ايمان : لا بس هو اكيد بيحبني بدليل انه اختارني انا دوناً عن بقية البنات .
الاخت : اه اختارك انتي عشان يتسلي بيكي , اصل بصي يا ايمان يا حبيبيتي
الطفل لما بتجيبيله لعبة بيبقي في الاول مهتم بيها جدا وميستحملش عليها خدش
مرة في مرة يبتدي يسيبها في اي مكان وساعات ينساها وبعدين يبتدي يكسّر فيها بعد ما خد اللي هوا عايزه
لكن اللعبة اللي بتبقي محفوظة ومصانة مش اي ايد تتمدلها بعيد يبصلها كأنها حاجة صعب انه يوصلها هو بيحاول بس مش عارف ولما مامته تنزلها يلعب بيها بيحاسب عليها اوي لانه عارف انها ممكن تروح منه في اي وقت
* كان صعب انه يوصلها فصعب انه يفرط فيها *
فاهماني يا ايمان ؟

ايمان اقتنعت شوية بكلام الاخت :
بس هو وعدني انه هيرتبط بيا وهيطلبني من بابا لما نخلص الجامعة.
الاخت : ااااااااااااااااه بعد 5 سنين ؟!
ايمان : لا 4 بس
الاخت : مفرقتش يا ايمان 4 من 5 وايه اللي يثبتلك انه ناوي يخطبك ؟
ايمان : حاجات كتير زي ; حبه ليا وهداياه اللي مغرقاني ورسايله ورناته وكل حاجة فيه بتثبت دا .
الاخت : كل دي اثباتات تثبت انه بيعلب بيكي يا ايمان صدقيني يا حبيبتي .
ايمان :

لا يا اختي هو بيحبني بس مشكلته انه مش متدين فعشان كدة مش عارف يعبر عن حبه دا بالطريقة الصح .
الاخت : اي رجل يا ايمان مهما كان متدين او مش متدين عمره ميقبل ع شريكة حياته انها تتفضح كدة ويقبل انك تخوني اهلك عشانه صدقيني يا ايمان دا مش بيحبك , دا لو كان بيحبك بجد كان جه وطلبك علطول من باب البيت مش من الشباك زي الحرامية .

((..... وليس البر بأن تأتوا البيوت من ظهورها ولكن البر من اتقى وأتوا البيوت من أبوابها )) البقرة - 189

ايمان مش مقتنعة انه مش بيحبها : هو لسه مش مؤهل دلوقت للخطوبة وكدة .
الاخت : مش مؤهل يبقي يبعد عنك وميخنش اهلك وبعدين هو مش مؤهل انما انتي مؤهلة يجيلك عريس تقي يقدّرك ويكون مؤهل للمسؤلية لانك غالية ولا ايه ايمان ؟
ايمان مقتنعة جداا بكلام الاخت ولكن .. : طيب اعمل ايه يا اختي ؟
الاخت : انتي انتبهي لدراستك عشان خلاص لازم نبدأ نذاكر الامتحانات خلاص ولو عايزة اي حاجة اشرحهالك انا تحت امرك , وقدر الامكان كل اما تفكري في الشاب دا اشغلي نفسك وافتكري ربنا وان دا شخص بيكرهك عايز لكي الشر , ماشي نتعاهد ؟
ايمان : ربنا يسهل
الاخت : اهم شيء هو ارادتك انتي وتزودي جداا في الطاعة وتطلبي من ربنا يعينك .
ايمان : حاضر يا اختي انا حبيتك اوي وكلامك زي البلسم , إن شاء الله نتقابل قريب .
الاخت : إن شاء الله حبيتي وانا كمان حبيتك بس اهم حاجة انك تحبي ايمان وتحبي لها الخير والستر ماشي يا استاذة ؟
ايمان : ماشي ومش قادرة تبتسم .


وخلصت المقابلة

ايمان بتفكر ف كلامها وانه مش بيحبها وبيعلب بيها وحست ان كلام الاخت صح وانها خسرت حاجات كتير اوي بسببه ,
فتلاقي التليفون يررررررن
مين ؟؟؟

الشاب المكار



وتحتار ترد ولا لأ

ارد اهزّئه واقوله متكلمنيش تاني ؟
بس يا تري هقدر ؟؟؟

ولا مردش خالص احسن ؟؟
.....
فالاتصال يقطع

تلاقي رسالة اتبعتت :
(( ايمان انتي ليه مش بتردي ؟ انا قولتلك اسف ومش هتحايل عليكي اكتر من كدة براحتك بس افتكري انتي اللي بدئتي ..والبادي أظلم ))



ايمان تقري وتستغرب ..انا اللي بدئت ؟ بدئت بايه ؟ هو بيهددني ولا ايه ؟
فتبدأ تخاف وتفتكر انه ممكن يئذيها
وكان لها صور معاه ايوة ساعة لما كنت معاه وقعد كل شوية يصورني وبعدين اعطي الموبايل لزميله عشان يصورنا مع بعض
يا نهاااااااااار ابيض وانا كنت زي الهبلة فعلا زي ما قال الظابط
وكمان بعتله رسايل كتير واكيد هو محتفظ بها ع الموبايل ,

طب هو كان يقصد تهديد بجد ولا قصده انه مش قادر يبعد عني
ياربي اعمل ايه ؟
والتليفون يرررن مين ؟

الاخت المنتقبة
الحمد لله اتصلتي في الوقت المناسب
ايمان : السلام عليكم
الاخت : وعليكم السلام ورحمة الله وبركاته
ايمان : الحمد لله انك اتصلتي يا اختي الحمد لله
الاخت : ها يا حبيبتي وصلتي البيت ولا لسه انا حبيت اطمن عليكي , خير حبيبيتي مالك ؟
ايمان : لا انا لسة ف الطريق وحصل جديد كمان ف الوقت دا .
الاخت : خير ؟
ايمان : كان بيتصل بيا وانا مردتش فبعتلي رسالة تهديد وانا خايفة منه .
الاخت : تهديد ؟؟؟؟
ازاي طمنيني يا ايمان هو ماسك عليكي حاجة ؟
ايمان : لا الحمد لله مفيش اي حاجة وحشة من اللي جت في دماغك , كل الموضوع اني ليا صور عنده ورسايل وخايفة يوريها لبابا او حد من البيت .
الاخت : يااااااا يا ايمان اشمعنا دلوقت خايفة ؟ ومخفتيش ساعتها من ربنا ؟؟ ربنا اللي شايفك ومطّلع عليكي في كل مكان وزمان !!!؟؟؟
ايمان وبتعيييييييط : الشيطان بقي يا اختي انا مش عارفة اعمل ايه ؟
الاخت : طيب نستعيذ بالله منه ونبدأ صفحة جديدة مع ربنا وخليكي ع يقين تاااااام انك طالما رجعتي لربنا وتوبتي اليه هيقف معاكي وهيبعد شر هذا الشاب عنك .
ايمان : ونعم بالله الله يطمنك يا اختي . انا مش عارفة اشكرك ازاي .
الاخت : متقوليش كدة طبعا اهم شيء انتي طمنيني عليكي وزي ما اتفقنا بقي وانا هطمن عليكي دايما .
ايمان : ربنا يخليكي والسلام عليكم .
الاخت : وعليكي السلام ورحمة الله وبركاته

ايمان اطمنت من كلام الاخت
وقررت انها تتوب لله وتقاوم نفسها
وتشوف حياتها كلها اللي هي مقصرة فيها
لكن ازاي الشيطان يسبها تخد قرار قاطع زي دا ؟؟؟
فالولد يتصل



ايمان : يوووووووه

وخلصت حلقتنا عند يوووووه بتاعة ايمان
يا تري ايمان قالتها حيرة برده وانها بتفكر ترد عليه ؟
ولا هتخد بكلام الاخت وخلاص هتقطع علاقتها به نهائي ؟
وهل هتبقي اقوي من الشيطان وهتقاوم نفسها وتختار ربنا ولا هتختار تكملة العلاقة المحرمة وطريق الضياع ؟
طيب ماما وبابا كانوا فين امبارح وايه حكايتهم ؟

هنعرف كل دا في الحلقة القادمة إن شاء الله


فاكهة حلقتنا




الحب والشباب للشيخ مسعد أنور


دواء العشاق للشيخ العريفي



دمتم في حفظ الله